1Pe 1 | MHL | STEP | Aria parosifa fain yo Yeesus Krais aposel Pita-ke ni Yuuda eena opora wiar opiman nain nia siisimomiyem. Ni miiw oko oko-pa, Pontus, Galesia, Kapadosia, Esia ne Bitinia, nan ikomakeman nain.

1 Peter 1

1 Aria parosifa fain yo Yeesus Krais aposel Pita-ke ni Yuuda eena opora wiar opiman nain nia siisimomiyem. Ni miiw oko oko-pa, Pontus, Galesia, Kapadosia, Esia ne Bitinia, nan ikomakeman nain. 2 Ni Yeesus Krais opora ookeka naep, ne ona aka-ke nia yasuwinok naep yiena Auwa Mua Maneka ona iiriw naap maep nia nanikak. Ne Ewar Eliwa-ke nia saliwami ona teeria-pa nia wuak, ni teeria nain. Yo feenap nia naiyem, Mua Maneka kema eliwa niemi anane maneka nia asipam-ikainok.

Maa eliwa iinan owowa-pa yiar ikua

3 I Mua Maneka unuma wiar piriyen, eena yiena Maneka Krais Wiawi nain. Ona manek akena yia kemalep o sesekeya orop ikok umok. Umep iikirap eliwa ikowa kema yieya i kukusa enumaremik. 4 Ne naapeya i maa eliwa Mua Maneka owow iinan-pa yia wuap-puomak nain neeke makena urufiyen naep ikemik. Maa nain beelalowa ne samorarowa marew, eliw akena yiar ikainon. 5 Ni opora wiar opiwkin Mua Maneka ona kekanow maneka-pa pika nia opak. Ne naap nia urufam-ikaeya miiwa weeserow epa-pa Yeesus Krais nainiw ekapep yia aawowa maek nain, makena ariman ekapemi yia aawep-puinon.

6 Naapeya ni nain kema suuwap kemelam-ikaiman. Makena, ni aakisa akimowa sira-sira niar imenaromakiya nain sirirowa aawowa-ke, nain eeya me ikainon. 7 Nain nia akimowa-ke, ni kekanep Yeesus Krais opora opap ikeman-i e weetak. Nain maa oko gol naimik nain mukuna-pa kuumiwkin tumina mesenalep gol akeniw imenarinon, naap saarik. Ne ni opora opiman nain gol saarik akimowa-pa opora baliwep opiman. Nain gol-na miiw maa oram-ke, miiw onaiya mesenalinon, ne ni opora opiman nain makena ne maa maneka-ke. Naeya Yeesus Krais ekapow fofa neeke ni parin maneka-pa wiar ikok unum maneka aawowen. 8 Makena, ni mokoka-pa me urufaman, nain o kookaliman. Ne opora wiar opiman, nain o me urufiman. Ne kemelow manekiw ikaiman. 9 Ne ni opora wiar opowa-ke, naap maemi kekanep ikok siisia urufowen, Mua Maneka-ke nia aaweya ni eliwa ikowa maa nain.

10 Mua Maneka yia aawowa maek, ne ona yia saliwami yia asipiya, ne Krais sirirowa sira-sira aawep ikoka unum maneka aawinon, opor unowa nain ona Ewar-ke wi iiriw profet kema wieya nain maem-ikemik. Maa maem-ikemik nain epa iikamin imenarinon ne kamenap imenariya nain ikumap, opor onoma nain baliwep mikap ookami yaawerow marew akupami maem-ikemik. 12 Yeesus Krais opora aakisa mua papako nia maakimik nain Mua Maneka-ke Ewar Eliwa iinan-pa sesekeya kema wieya opora nia maakimik. Ne iiriw wi profet pun opora kuisow nainiw maem-ikemik. Nain Mua Maneka-ke kema wiek, feenap, wi me wiena wiam kema suuwap opora nain maem-ikemik, weetak. Ni muuta nain opora nain maem-miawemik. Ne wi ensel pun opor onoma nain amisaru naep onimik.

Mua Maneka sira ookami dubil eliwa ikowa sira ookowa-ke

13 Naapeya ni maa oko oko kema suuwowa piipuap Yeesus Krais opora opap kema manekiw ikok arep ikeka. O ariman arowa-pa Mua Maneka yia saliwami yia asipiya nain muutiw kemaiw ikeka. 14 Mua Maneka opora wiar miimap ookiman. Naemi ni iiriw Yeesus Krais me amisarowa ikok sira onam-ikeman nain piipuaman. Sira nain nainiw me ookeka. 15 Mua Maneka eena nia farek nain dubil maneka, ne kaken eliwa ikaiya. Naapeya ni maa unowa onami dubil eliwa ikowa sira nain ookeka. 16 Eena ona opora maek, feenap,

“Yo dubila ne kaken eliwa ikem. Naapeya nis pun dubila, ne kaken eliwa ikeka.”
(Wok Pris 11.44-45, 19.2, 20.7)

Krais sesa maneka-pa yia sesenarek

17 Mua Maneka kakeniw wi mua sira wiar urufap wia mekawiya, oko-okaiwi-pa me ariya. Ni anane o faremi, “Oo Auwa” naiman. Naapeya ni aakisa feenap maeka, miiwa fain me yiena owowa-ke. Neemi ni aakisa ikeman fain o ekima opap sira kakeniw ookeka. 18 Ni amisareman, ni iiriw niena neke sira ookam-ikeman nain maa eliwa-ko me niar imenarem-ikua. Ne naap ikaiwkin os-ke nia puukak. Nain me gol e siliwa, maa samorariya nain-pa nia sesenarek, weetak. 19 Sesa manek akena-pa nia sesenarek, sesa nain Krais aka naneka, sipsip eena ikemika marew ne mia kuu-kuuniya marewa nain ifakimiwkin aka sawikak nain. 20 Mua Maneka miiw maa muutitik me onowa ikok o uuwowa nain pepekimok. Ne ni muuta nain aakisa miiwa weeserow epa-pa ariman wuak. 21 Ni opora wiar opami Mua Maneka maken akena-ke naiman, eena Yeesus Krais umep ikaeya iikirowami unum maneka iwok, Mua Maneka nain. Naeya ni opora wiar opap maa maek nain kemaiw niam tuupam-ikeman.

Maken akena yiam kookalem-ikaiyen

22 Aria ni aakisa opor makena ookami niena kukusa niam saliwaman. Naemi wi Mua Maneka teeria epaskun maken akena wia kookaliman. Naapeya niam kookalowa nain maken akena naap niam kookalem-ikeka. 23 Moram ni Mua Maneka opora anane ikaiya nain wiar ookiman. Opora nain-ke kukusa enuma nia aroweya naap ikeman. Naeya anane ikowa-ke, me mia onaiya umowa-ke. 24 Mua Maneka opora maek naap. Feenap,

“Miiw mua unow maneka sipira saarik, ne kekanowa sipir wowosa saarik. Sipira saniwaremi wowosa ururiya, naapeya wis pun epa maala me ikaikuan.
Nain Mua Maneka opora-ke anane naap ikaiya.”
(Aisaiya 40.6-8)

Anane nia maakiwkin miimaman nain.